Pa preparashon di algun hóben ‘spesial’ pa bira empresarionan ‘spesial’.
WILLEMSTAD.-
Resientemente direktiva di Global Entrepreneurship Week Curaçao (GEW) a risibí e grato notisia ku e organisashon mama, Global Entrepreneurship Network (GEN), a nominá e proyekto ‘Man Kontentu’ pa un premio internashonal. GEN anualmente ta duna rekonosementu na proyektonan empresarial ku a resaltá den kuadro di Global Entrepreneurship Week. E proyekto ‘Man
Kontentu’, ku a ser prepará i ehekutá pa Fundashon Kas di Arte Kòrsou, ta nominá den e kategoria ‘Barrier Breaker’ komo un di e proyektonan mas inovativo i kibrando barera.
Aña pasá, mama di un hóben ku Down Syndrome tabata buska algu ku su yu por hasi pa asina e yu generá poko entrada pa su mes. Kòmbersando ku algun konosí nan a rekomend’é tuma kontakto ku sra. Sandra Lewis- Nieuw. Sra. Lewis- Nieuw e ora ei a pensa un proyekto den kua, via di Fundashon Kas di Arte Kòrsou, den un seri di workshop, a siña e hóbennan ‘spesial’, kon usa nan kreatividat pa krea produktonan ku nan lo por bende durante algun eksposishon di nan kreashonnan. E muchanan ‘spesial’ a risibí alabes lès i guia kon pa bende nan produktonan.
E proyekto a kuminsá ku 6 hóben spesial (ku Down Syndrome, Autismo etc.), i segun e workshopnan tabata desaroyá 2 hóben ‘spesial’ mas a mustra interes i a bin aserka den e grupo.
Fundashon Kas di Arte a risibí sosten finansiero di Prins Bernhard Cultuurfonds Caribisch Gebied (PBCCG), i tambe di Sharnice Leonora, dosente di arte i spesialisá den traha ku mucha ku limitashon.
Durante di e trayekto di preparashon di ‘Man Kontentu’ a hasi uso di téknika i material spesial teniendo kuenta ku e muchanan su interes i kapasidat. Entre otro a siña e hóbennan kon dekorá blusanan, kusinchi, lensu i tarhetanan hasiendo uso di fèrf i otro artefaktonan spesial pa e grupo di enfoke.
Den e kategoria ‘barrier breaker’, e proyekto ‘Man Kontentu’ tin nominashon huntu ku proyektonan di GEN Gran Bretania, GEW Dinamarka, GEN Israël, BGE Exelon i Hello Alice.
Direktiva di Global Entrepreneurship Week Curaçao ta felisitá Fundashon Kas di Arte Kòrsou ku e nominashon mundial. E organisashon mama, GEN, dia 20 di Sèptèmber lo anunsiá e ganadónan di e diferente kategorianan. “Pa nos, e solo echo ku e noble proyekto aki a hala atenshon di GEN i ta nominá ta nifiká ku Fundashon Kas di Arte Kòrsou i e 8 hóbennan ku a risibí e preparashonnan pa bira empresarionan ‘spesial’, ta ganadó,” sra. Elgenia Pieternella, presidente di Fundashon Negoshi Pikiña i Global Entrepreneurship Week Curaçao a bisa.